Scott Fagan's Mem.wa?

POST 72. Buckra De Paehae…“CAPTAIN HOOKFOOT” LIVE AT THE J. ANTONIO JARVIS MUSEUM, Pollyburg Hill, St.. Thomas, Virgin Islands.

 Home folks appear to have enjoyed “Granfaddah Buckra An De Bo’ Hog” So, well…here is another. This one is a  live, “in performance” recording  of “Captain Hookfoot” recorded at the Jarvis Museum, on Pollyburg Hill, in St. Thomas Virgin Islands.

I hope that you will enjoy it as much as the audience and I did that wonderful evening at Jarvis.. lilfishrecords.com..(out of  St.Thomas, Virgin Islands) is currently preparing to release (This November) a Buckra CD entitles “So Sae Buckra De Paehae” Volume 1.

The CD contains eight Buckra stories, equaling a full 60 Minutes of good fus class Virgin Islands schupidness!.

Here it is…   Captain Hookfoot!                                      

 It came to pass that one day dem boy an me was warm up to go onna expedition way doung doung doung in de wes to Bordeaux Bay to fine de gol lef dare in de days of ol by de pirates of ol dat somebody say dey kno fo sure, was hide up in de top of a tamon tree.

We had quite a long ways to go an many a place to see before we would return home dat evening. Fus, on de way to Bordeaux we plan to stop by de ol Plantations at Filamingo Pon an de ol Plantation in Fortuna to pick up whatever treasure we could fine along de way den continue on to Botney Bay an clean out de treasure doung dere befo we dig up de big one at Bordeaux an bring it home.

My secret hope was dat we would only fine a likkle bit of treasure along de way, quick  quick so dat we would’n fine ourself all de way doung Bordeaux after de night fall in de ol winswep an abandoned ruins doung dere in de in de pitch black of de dark night.

Now, I kno how tu preten tu be brave when people watchin’ jus like anybody else, but lemme tell yu sumting, I have seen almost grown man bawlout fo de muddah when dey tink a Jumbie hol dem or see a Jumbie commin. An boy don tink fo a minute dat doung dae ain de home a Jumbie, hundreds a dem an more. Jumbie like sanfly me bouy, De minute de sun go down an shadows fall on dem, de Jumbie dem come pourin up out de groun an dropping doung ou de trees to see wha goin on… Laad meboy, yu don’t wan to be de ting dey fine. Jumbie frum all part a de worl me boy every one a dem wan to climb up in yu coconut,  an take ovah de driving 

 Jumbie fighting Jumbie all jumble up an top a one annudah, Carib Jumbie, trying to eat up de Arawak Jumbie wha fighting wid de Spaniard Jumbie who fighting wid de Cha Cha Jumbie, ah ah mean de french Man Jumbie,  who fightin wid de English Jumbie who clashin wid de Dane man and de wild eye African Jumbie an all a dem fighting wid Black tooth de Pirate Jumbie,  excepin if somebody who ain dead fall in wid dem, den every las one a dem Jumbie gon jump on he to see who could suck out he eye an climb in he coconut tu come back to life.

Das wha de Jumbie wan tu do yuh kno, take ovah yu coconut, an jump on yu donkey and go back town an preten like he is you, an take away yu wife an yu girlfrien, Yes man dat happens all de time.

 Well like ah sae, we was ready fo de high adventure, Bucky an Brudsie an Boomie an Tutie and Tutsie an Papoon an Joel an  de res a dem boy, de only problem was who gon be who, everybody wan to be Roy Rogers an ride in de front ah de donkey. Not me dough, I is Gene Autry de singing cowboy an nobody cain argue wid dat, I could be who I wan to be because is my donkey an I gon ride in de front. All de same, de Laad ha sen a bunch a donkey, man we had bou tree o fo a dem. Among dem is de one wha ah have to keep me eye on de mos because he is nuttin but a schupid jackass wha broke me bowstick when ah was protekkin me lil jenny gurl Madras, I wouldda stay behine ahe exceppin Gene Autry got to lead de geang, so ah wa goin tu have tu go doung de road kina sideways.

All de same alla dem Roy Rogers an Lash Larue an de Long Rangeah an Jungle Jim (wid de inscruchable Fu Man Chu thro in in dey) every one a dem tink dey should be leadin de ban, an das ok wid me becausin de only time I acktually really got tu be in front is when de Jumbie dem cumin frum behine.

 If yu wan tu kno de trut, when Jumbie cummin, I gon jump off de donkey an run fo me life on me own two foot. I done keaar wha yu say.. de ain a donkey in de worl gon run faser dan me when Jumbie cumin from behine

Jeesumbred what a ting dat would be..news flash tonight meboy, man dead doung Bordeaux, donkey bawlin blood, Jumbie biteup man head befo dey could climb up in de driver seat, but not me me boy, I gane like a  “flash of white in de night”. 

Dem boy could stan de wid dey schupidness how yu gon fight a Jumbie?Wha yu gon hol an tu when yu wan tu thro im doung? How yu gon thro him doung when yu fraid tu touch him? Who gon touch a Jumbie? Not me meboy. I jamming de ol gol in me pocket, an I gan. Who wan tu be in front a me den bettah cum good because when dem Jumbie cum pourin up ou de groun, I jumpin off de donkey an I gan.

Wall we moseyed on down de trail headin out wes singin de “yippi kai yi yoo get along little donkey song” an up an ovah de officers quarters hill and doung in de valley where de green grass grows, an up again to de top a de hill by Jahnbruisebay where upon we stopped to survey all dat lay before us.

 As we moseyed on doung to de bay, dem boy tinkin bou all de goobers an rasinetts dey gon buy wid de pirate treashah. I tinkin bou Jumbie,. when jus den, de closes ting to a Jumbie jump ou de bush an grabb on to me donkey head. It was de notorious “hookfoot” one a dem very ol an very crazy “ol crazy man”  wha live doung Jahnbruise, bunnin coal an drinking rum. Hookfoot was raving an wavin a cutlash.

In an instant I fell back on me yankin “Isn’t she.. Isn’t she a pretty donkey? I said in a quakey timid likkle voice, “Oh Yeah? yo lil red arm muddah skunk yu”, he thunderd, “I’ll kill yu muddah skunk hare today, a pretty donkey? A pretty donkey? Yu donkey teeffin Muddah $%^%$ yu!  I katch yu, yu yu lilred arm Buckra ting yu, Dis donkey is MINE. Get aff me donkey oh ah sweaa I’ll kill yu muddah skunk  rite here today”! All dis time he slashin de cutlash back an fort gains de asphalt an de sparks dem flyin up like de fort of July.

 Well ah had tu catch me self quick when ah realize all a dem boy watchin an ah cain let meself be embarrass like dat in front a dem, at de same time ah kina glad tu realize what evah gon happen here, I ain goin have tu deal wid de Jumbie dem doung Bordeaux tonight. 

“Well Mr. Hook Sah” I said, as I jumped doung off de donkey,  “I am glad to be de one who was able to fine an secure an return dis fine animal to you, mah name is Gene Autry de singing Cowboy an mah game is mekin everyting have a happy endin. An wid dat I’ll bid yu a good day sah, I have tu be getting back to de movies”.

An wid dat I turn aroung ana run rite home savin’ de pirate treasah fo annudah day, sometime early in de manin….Yes man,..an das de trut!